Rama krah Naços në Berat, thumbon Metën për vlerësimin e Dvoranit

Kryeministri Edi Rama komentoi sërish sot gjatë një takimi me banorë të Beratit, vlerësimin e gjyqtarit Ardian Dvorani nga Departamenti  i Shtetit.

“[…] e fundit që ka krijuar një turbullirë të madhe në lagjet e tjera të politikës me vendimin e sekretarit të shtetit për të vlerësuar me çmimin e veçantë të nderit të Shteteve të Bashkuara, një gjykatës shqiptar që dihet dhe pse është bërë i njohur, dihet dhe me kë është përplasur është shumë domethënëse,” – u shpreh Kryeministri Rama.

Kryeministri u shpreh se drejtësia nuk mund të vihet nga qeveria, por “një forcë politike e cila qeveris vendin e ka në dorë ta mbështesë ose ta pengojë një proces të tillë”. Rama tha se përgjatë këtyre viteve “është e qartë se kush po përpiqet ta pengojë Reformën në Drejtësi” duke nënkuptuar këtu Presidentin Ilir Meta.

Gjatë fjalës së tij në Berat Rama ishte krah ish-ministrit të Drejtësisë Nasip Naço, i cili është larguar nga Lëvizja Socialiste për Integrim dhe i është bashkuar Partisë Socialiste. Naço do jetë kandidat për deputet i PS-së në qytetin e Beratit.

Ardian Dvorani u vlerësua nga SHBA si “kampion i anti-korrupsionit” si një nga 12 personat që kanë drejtuar nisma kundër korrupsionit në botë.