Manastirliu: Të hënën dërgesa e radhës nga ‘Pfizer’, brenda 10 ditëve të para të marsit vijnë vaksinat e para nga ‘Covax’

Ministrja e Shëndetësisë dhe Mbrojtjes Sociale, Ogerta Manastirliu, nga Arena Kombëtare, ku po vijon vaksinimi i personelit shëndetësor spitalor dhe të kujdesit shëndetësor parësor bëri me dije se deri tani janë kryer 11 mijë vaksinime, ndërsa tha theksoi se ditën e sotme hapet qendra e vaksinimit në Kukës dhe brenda javës në Korçë.

Znj. Manastirliu u shpreh se duke nisur nga java tjetër do të vijnë sasitë e radhës së vaksinave të kontraktuara me Pfizer.

“Javën tjetër do të vijë dërgesa e radhës nga Pfizer. Me ardhjen e vaksinave, sipas kalendarit të kontratës që kemi lidhur me Pfizer-in, ditën e hënë do të vijojmë të intensifikojmë dhe të shtrijmë në vijim vaksinimin. Gjithashtu pritet që në 10 ditëshin e parë të marsit, të kemi edhe një dërgesë të parë nga kontrata me Covax-in. Janë planifikuar rreth 14,400 doza, të cilat priten që të vijnë nga kjo marrëveshje e lidhur dhe e parapaguar nga qeveria shqiptare”, bëri me dije Manastirliu.

Teksa foli për vaksinimin e të moshuarve, Manastirliu tha se me përfundimin e mjekëve, infermierëve, gjithë personelit shëndetësor, me përfundimin e vaksinimit të të moshuarve në azile, kujdestarëve të tyre, gjithashtu do të intensifikohet edhe vaksinimi i të moshuarve dhe do të vijohet edhe përgjatë ditës së diel me vaksinimin e të moshuarve +80, duke filluar me fashën +90 vjeçare.