Kandidatë me probleme në zgjedhje, Braho: Nëse nuk i skualifikojnë partitë, duhet ta bëjnë votuesit

Kandidatë me probleme në zgjedhje, Braho: Nëse nuk i skualifikojnë partitë, duhet ta bëjnë votuesit

Kryekomisioneri i KQZ-së Ilirjan Celibashi nëpërmjet një postimi në Twitter u bëri dhe njëherë thirrje partive politike për pastërtinë e listave zgjedhore.

Anëtari i Komisionit të Ankesave dhe Sanksioneve në KQZ, Ledio Braho tha për Euronews Albania se në kushtet e ndryshimit të formës së përzgjedhjes së kandidatëve përmes votës preferenciale, skualifikimi i personave problematikë duhet të bëhet nga vetë zgjedhësit, nëse nuk bëhet nga partitë.

“Deri tani, veç thirrjes së ndërkombëtarëve nuk ka ndonjë kërkesë nga partitë për verifikim të kandidatëve të tyre. Përgjegjësia është e partive nëse sjellin kandidatë që vijnë nga familje që preken nga ligji i dekriminalizimit. Por kjo varet edhe nga votuesit, që këtë radhë e kanë mundësinë, për vetë formulën e votës preferenciale, që t’i skualifikojnë këtë kandidatë, duke treguar se nuk bëjnë pakt me krimin. Vota është ajo që mund t’i skualifikojë”, tha z. Braho.

Sipas tij, dekriminalizimi i kandidatëve për deputetë nuk është vetëm çështje e vullnetit politik të partive, por është detyrim kushtetues për secilin subjekt që në listat e kandidatëve të ketë vetëm individë që nuk janë në kushtet e ligjit për dekriminalizimin.

Z. Braho theksoi faktin se ligji i jep mundësinë të gjitha partive që të bëjnë kërkesa për kandidatët që janë në lista, në mënyrë që institucionet përgjegjëse të bëjnë kërkime dhe verifikime nëse kandidatët potencialë janë subjekt i ligjit të dekriminalizimit.