Policia spanjolle sekuestron 7.5 tonë kokainë, në pranga 20 persona nga Ballkani 

Policia spanjolle tha sot se ka sekuestruar 7.5 tonë kokainë nga Amerika e Jugut në portin veriperëndimor të Vigos, e cila ishte fshehur në ton të ngrirë që do të shpërndahej në të gjithë Evropën.

Në aksion janë arrestuar edhe 20 persona që i përkasin dy organizatave nga Ballkani, i cili siç thuhet është “goditje e madhe” për një prej rrjeteve më të forta të shpërndarjes në Evropë, raporton Reuters.

Policia thotë se kjo është shuma më e madhe e kapur ndonjëherë në Galicia, rajoni i Atlantikut të Spanjës që kontrabandistët e kanë përdorur për dekada për të shpërndarë drogë në Evropë.

Rrjeti i kontrabandës krijoi një kompani për të importuar dhe tregtuar mallra të ngrira nga vende të ndryshme të botës, si dhe për të investuar në pasuri të paluajtshme dhe e përdori atë si front për kontrabandën e drogës.

Policia spanjolle gjatë mbikëqyrjes disamujore të kompanisë zbuloi se kompania po fshihte përfshirjen e saj në kontrabandën e drogës duke dërguar një numër të madh kontejnerësh me marka të kompanive të ndryshme nga e gjithë bota në portet e tjera të Gadishullit Iberik.

Policia sekuestroi gjithashtu 3.5 tonë kokainë të fshehur në kontejnerë transporti në portin e Valencias.