Kosova do t’i marrë vaksinat në muajin maj, COVAX do të dërgojë 100 mijë doza AstraZeneca

COVAX ka publikuar listën e vendeve të cilat do të furnizohen me vaksina deri në fund të muajit maj. Në këtë listë është vendosur edhe Kosova. Lajmi i konfirmua edhe nga zëdhënësi i ministrisë së shendetësisë në Kosovë, Faik Hoti.

Kosova pritet të përfitojë 100,800 vaksina AstraZeneca të prodhuara nga Instituti i Indisë “Serum”.

COVAX ka deklaruar se furnizimi do të bëhet në afatet kohore shkurt-mars dhe prill-maj, por koha e dorëzimit varet nga disa faktorë duke përfshirë miratimin nga vendet përfituese për përdorimin e vaksinës, disponueshmërinë e prodhimit, dhe kritere tjera sikurse planet e vaksinimit dhe marrëveshjet e dëmshpërblimit, autorizimet e importit, etj.

Kosova ende është duke pritur dozat e para të vaksinave anti-COVID, edhe pse ishte premtuar se ato do të mbërrijnë në muajin shkurt, një gjë e tillë nuk ndodhi.

Prej nisjes së pandemisë, autoritetet kosovare kanë pikasur mbi 70 mijë raste me COVID-19.

Lexoni gjithashtu:

Shkurti mbyllet me 97 vdekje, Kosova ende në pritje të vaksinave të premtuara

Rriten rastet e infektimeve në Kosovë, 8 persona humbin jetën në 24 orët e fundit nga COVID-19