Kërkim për gaz në Dumre, ministrja Balluku nënshkruan memorandumin me kompaninë italiane

Ministrja e Infrastrukturës, Belinda Balluku ka nënshkruar një memorandum për Projektin e Depozitimit nëntokësor të Gazit Natyror në zonën e Dumresë.

Ky memorandum parashikon bashkëpunimin midis Albgaz dhe kompanisë italiane SNAM për zhvillimin e depozitave nëntokësore të gazit natyror.

“Zhvillimi i rrjetit të transmetimit të gazit është një nga objektivat strategjike të qeverisë shqiptare, në kuadër të të cilit është miratuar edhe master-plani kombëtar për gazifikimin e vendit, pjesë e të cilit është edhe projekti i depozitimit nëntokësor të gazit natyror në zonën e Dumre”, tha ministrja.

Ajo shpjegoi po ashtu arsyet se pse është zgjedhur zona e Dumresë për këtë plan.

“Dumreja është përzgjedhur për zhvillimin e një projekti depozitimi për shkak të formacioneve kripore, të cilat ofrojnë kapacitet të mëdha depozitimi që tejkalojnë kërkesën kombëtare dhe krijojnë mundësinë e mbështetjes për një sistem gazi të integruar transballkanik”, shtoi znj. Balluku.