Parlamenti i hoqi imunitetin/ Berisha: Antikushtetuese, opozita do mobilizohet

Ish-kryeministri Sali Berisha të cilit ju hoq imuniteti tha pak pas daljes nga salla e Parlamentit se aksioni opozitar do të vazhdojë. Parlamenti votoi heqjen e imunitetit të deputetit demokrat Sali Berisha me 75 vota pro.

Berisha këtë e quajti një akt antikushtetues, i cili sipas tij do të përballet me aksionin më të madh opozitar nën moton “O sot, o kurrë”.

“Sot, narkoparlamenti në një akt antikushtetues, antidemokratik, votoi në kundërshtim me çdo procedurë kushtetuese, në kundërshtim me ccdo procedurë ligjore, për heqjen e imunitetit dhe arrestimin tim.

Në një mënyrë apo në një tjetër, parlamenti sot vazhdoi veprën që dështoi me datën 9 shtator, dy vite më parë.

Por në qoftë se dështoi me 9 shtator, ju garantoj se sot do jetë më i dështuar se kurrë, se ky vendim jo që nuk mund të realizojë qëllimet, shkatërrimin e opozitës, por ky vendim do mobilizojë opozitën në shkallën më të lartë, dhe nën moton: o sot o kurrë, do i japë përgjigjen më të merituar këtij regjimi.

Ajo që mund të them se nga dita e sotme është se parlamenti nga klandestiniteti, përfundoi në parlamentin e vrimës së miut.

Edi Rama u fut sot jo nga dyert zyrtare, nga dyert zyrtare të parlamentit, por nga tunelet që lidhin parlamentin me zyrën e Skënder Gjinushit.
Pra, u fut nga vrima e miut në parlament.

Beteja e nisur vazhdon fuqishëm si kurrë më parë dhe e garantoj se kjo opozitë do qëndrojë e pamposhtur në mbrojtjen e idealeve demokratike të saj”,-tha Sali Berisha.

LEXONI GJITHASHTU:

• “Hiqni gardën”- Berisha refuzon të marrë fjalën në seancën për heqjen e imunitetit
• “Do vi momenti që do përdorim forcën” -Dogjani: Po na pengojnë hyrjen në parlament