Kryeministri kritikon kryedemokratin Basha për grumbullimet elektorale në kohë pandemie: Votat para jetës, pesë me hiç

Kryeministri Edi Rama, nga Fieri ku ndoqi nga afër procesin e vaksinimit të mësuesve, u tregua kritik ndaj kreu demokrat, Lulzim Basha i cili sipas tij po mbledh masivisht njerëz duke dhënë shembullin më të keq në këtë kohë të vështirë pandemie.

Teksa u bëri thirrje njerëzve të distancohen nga situata të tilla, të krijuara sipas tij nga njerëz të papërgjegjshëm, kreu i qeverisë tha se prioriteti numër 1 mbetet shkëputja e zinxhirit të infektimit me COVID, përmes vaksinës, por edhe kujdesit.

Sipas tij, përballë kësaj sfide, zgjedhjet dhe fushata nuk janë asgjë.

“Është fatkeqësi e madhe që për shkaqe politike dhe interesa partiake dikush jep shembullin më të gabuar duke grumbulluar njerëz dhe ngritur gishtat mbi makina.

Por nga ana tjetër është e rëndësishme që njerëzit të kuptojnë që kjo është një luftë për jetën, një luftë për jetë a vdekje për shumë njerëz që janë më të ekspozuar dhe më të dobët nga pikëpamja fizike, ndaj të gjithë duhet të bëjmë kujdes, të distancohen nga situata absurde që tregojnë injorancë dhe papërgjegjshmëri të madhe nga ata që i krijojnë.

Këputja e zinxhirit të infektimit përmes vaksinimit dhe kujdesit është prioriteti 1, fushata, zgjedhjet vendet në parlament janë pesë me hiç para kësaj sfide, para këtij objektivi”, tha kreu i qeverisë.