Trafikim| Arrestohet i riu, AMP pezullon 4 policë e sekuestron 130 mijë euro makina

Një 32-vjeçar në Korçë ka rënë në prangat e Policisë me akuzën e “trafikimit të mjeteve motorike”.

Përmes një njftimi, bëhet me dije se AMP lidhur me këtë rast ka pezulluar nga detyra edhe 4 punonjës të policisë për “shpërdorim detyre”.

Po ashtu bëhet me dije se në cilësinë e provës materiale, janë sekuestruar edhe disa automjete me vlerë rreth 130 mijë euro.

Njoftimi i AMP:

Agjencia e Mbikëqyrjes Policore (Rajoni Elbasan-Korçë) ka ekzekutuar urdhërin e Prokurorisë për ekzekutimin e vendimit të Giykatës së Shkallës së Parë të Juridiksionit të Përgiithshëm Korçë, e cila ka vendosur masën e sigurisë “Arrest në burg” për shtetasin M.C., 32 vjeç, si i dyshuar për kryerjen e veprës penale “Trafikimi i mjeteve motorike”.

AMP ekzekutoi gjithashtu vendimin e Gjykatës, për masën e sigurisë “Pezullimi i ushtrimit të një detyre a shërbimi publik”, si persona të dyshuar për kryerjen e veprës penale “Shpërdorimi i detyrës” ndaj 4 punonjësve të policisë:

– Inspektor M.M., 32 vjeç, me detyrë punonjës policie pranë PKK Kapshticë;

– Inspektor S.L., 56 vjeç, me detyrë punonjës policie pranë PKK Kapshticë;

– Inspektor E.M., 35 vjeç, me detyrë punonjës policie pranë PKK Kapshticë;

– Nënkomisar M.A., 28 vjeç, me detyrë Specialist për hetimin e krimeve në Komisariatin e Policisë Korçë.

Nga hetimet e kryera me metoda proaktive në lidhje me këtë procedim penal, ka rezultuar se shtetasi M.C. ka trafikuar në Shqipëri automjete që rezutojnë të vjedhura në Greqi, duke iu bërë ndryshime në elementët identifikuese për t’i pajisur më pas me dokumente false, me qëllim shitjen në vendin tonë. Po kështu është arritur të dokumentohet me prova e fakte ligjore se punonjësit e Policisë, në shpërdorim të detyrës dhe në kundërshtim me aktet ligjore dhe nënligjore në fuqi, si edhe në shkelje të Procedurave Standarde të Punës, nuk kanë kryer verifikime mbi dokumentacionet e mjeteve, mungesat e prokurave apo autorizimet që duhet të dispononte shtetasi M.C. në momentin e futjes së këtyre mjeteve në territorin shqiptar.

Në cilësinë e provës materiale u sekuestruan 6 automjete të dyshuara të vjedhura, me vlerë 130 000 euro.

Materialet proceduriale i kaluan Prokurorisë Pranë Gykatës së Shkallës së Parë të Juridiksionit të Përgjithshëm Korçë për veprime të mëtejshme.

Hetimet vijojnë për përfshirje të shtetasve apo punonjësve të tjerë të policisë në këtë veprimtari kriminale.

#amp08009090

LEXONI GJITHASHTU:

• Në reanimacion që prej arrestimit, ‘i burgosuri’ ndërron jetë në spitalin e Durrësit
• Gazetari: Pse arrestimi i Berishës e ka shqetësuar Edi Ramën