Presidenti Meta dekreton katër anëtarët e rinj të Gjykatës së Lartë

Presidenti i Republikës, Ilir Meta ka dekretuar këtë të premte emërimin e katër gjyqtarëve të rinj të Gjykatës së Lartë. Gjyqtarët e dekretuar, të cilët i shtohen trupës së Gjykatës së Lartë janë; Sokol Binaj, Albana Boksi, Sandër Simoni dhe Klodian Kurushi, që vijnë nga radhët e sistemit gjyqësor.

Me emërimin e katër emrave të rinj, Gjykata e Lartë nga sot bëhet me shtatë anëtarë, nga 19 anëtarë, që duhet të ketë, sipas vendimmarrjes së Këshillit të Lartë Gjyqësor. Kreu i vendit shprehet i shqetësuar dhe kërkon nga Këshilli i Lartë Gjyqësor të përshpejtojë procedurat për emërimet e tjera në Gjykatën e Lartë.

Presidenti Meta thotë se nëse KLGJ funksionon me këtë ritëm, plotësimi i Gjykatës së Lartë mund të bëhet realitet në mars të 2024.

“KLGJ duhet të angazhohet me seriozitet, për të vijuar me ritme më të shpejta procedurat për emërimet e tjera në Gjykatën e Lartë, duke vepruar me pavarësi, integritet, dhe transparencë, për plotësimin sa më shpejt të Gjykatës së Lartë me të gjithë trupën e nevojshme gjyqësore dhe për t’i ofruar njëkohësisht kësaj Gjykate të gjithë mbështetjen e nevojshme”, thuhet në dekret.

Në Gjykatën e Lartë janë mbi 35 mijë dosje gjyqësore që presin shqyrtim, por mungesa e funksionimit të saj e ka bllokuar këtë proces, duke shkaktuar jo pak irritim tek palët e përfshira.

Bërja funksionale e Gjykatës së Lartë është edhe një nga kushtet, të cilat Shqipëria duhet të plotësojë në rrugën e saj drejt integrimit në Bashkimin Evropian.