“Ursula, jemi këtu!”- Fermerët rrethojnë Brukselin, kushtet për t’u tërhequr

Në autostradën Paris-Bruksel, fermerë të zemëruar shkruan me gërma të verdha dhe të dukshme nga larg: “Ursula, jemi këtu!”.

Mesazhi u shkrua me shkumës në rrugë në shenjë sfide dhe dëshpërimi, por edhe paralajmërimi në adresë të presidentes së Komisionit Evropian, që të mos i injorojë thirrjet e fermerëve për çmime më të mira dhe më pak burokraci.

Protesta përkoi me samitin e Bashkimit Evropian dhe si Von der Leyen, ashtu edhe liderë të tjerë të Unionit mund të shihnin nga dritaret e tyre turmën e fermerëve që protestonin në rrugë.

Disa qindra traktorë u mblodhën në sheshin “Luksemburg”, në kryeqytetin Belg, duke u bërë apel liderëve evropianë që t’i japin fund marrëveshjeve të tregtisë së lirë mes BE-së dhe vendeve të treta.

Ata duan një rishikim të marrëveshjes Mercosur me Amerikën Latine dhe që importet të jenë subjekt i të njëjta rregullave të cilave duhet t’u nënshtrohen produktet agrikulturore evropiane.

Gjithashtu, ata duan që rregullat e Unionit, të cilat sipas tyre kanë mbetur peng e burokracive, të jenë më fleksibël dhe më të thjeshta.

Traktorët e parë mbërritën përreth selisë së Parlamentit Evropian në Bruksel mbrëmjen e së mërkurës dhe të enjten paradite, buritë e tyre mund të dëgjoheshin në godinën kryesore të Komisionit Evropian, ku liderët u takuan.

Më herët fermerët bllokuan rrugët përveçse në Belgjikë edhe në Francë e Itali, për të penguar tregtinë në portet e mëdha të vendeve.

Në Paris, policia arrestoi 91 protestues që bastisën tregun më të madh ushqimor evropian. Autoblindat bllokuan hyrjet në tregun Rungis, në jug të kryeqytetit francez.

LEXONI GJITHASHTU:

• Marshojnë drejt Parisit| Protestat e fermerëve, bllokojnë autostradat në Francë
• Shpërthejnë protestat kundër Vuçiç në Beograd, kërkohen zgjedhje të reja