“Nuk garantohet siguria”, ndeshja Shqipëri-Angli rrezikon të anulohet

Ndeshja Shqipëri-Angli e vlefshme për eliminatoret e botërorit “Katar 2022” rrezikon të anulohet. Ky shqetësim u ngrit sot në mesditë nga Federata Shqiptare e Futbollit pas përgjigjes që mori nga autoritetet e rendit.

FSHF publikoi me shqetësim në web-faqen e saj përgjigjen se perimetri i jashtëm i stadiumit kombëtar, në të cilin biznese të ndryshme “kanë vendosur struktura permanente, hekuri, xhami dhe tenda të fiksuara […] cenon standardet e sigurisë gjatë zhvillimit të ndeshjes së futbollit”.

“Sa më sipër, strukturat e Drejtorisë Vendore të Policisë Tiranë, nuk garantojnë marrjen e masave para, gjatë dhe pas zhvillimit të ndeshjes së futbollit […]” – thotë në shkresën përcjellë FSHF-së drejtuesi i Drejtorisë Vendore të Policisë Tiranë, Rebani Jaupi.

“Anulimi i ndeshjes Shqipëri-Angli e parashikuar për t’u luajtur në “Air Albania Stadium”, do të kishte pasoja katastrofike për imazhin e vendit tonë, ekipin Kombëtar dhe në përgjithësi për futbollin shqiptar,” – thotë në reagimin e saj FSHF teksa kujton se më 17 mars i qe drejtuar Inspektoratit Kombëtar të Mbrojtjes së Territorit dhe Bashkisë Tiranë për të liruar hapësirat rreth stadiumit.

Shqipëri-Angli është parashikuar të luhet më datë 28 mars ora 18:00. Mbetet e paqartë se si do të veprohet dhe se çfarë zgjidhje mund të gjendet.

Stadiumi kombëtar u ndërtua nga e para në vitet 2016-2020, në kuadër të një investimi prej dhjetëra milionë euro me partneritet privat ku FSHF dhe qeveria merrnin përsipër një pjesë të investimit – kryesisht të hapësirave sportive.

Synimi kryesor i investimit ishte që “t’i jepej një shtëpi e denjë përfaqësueses së futbollit për ndeshjet ndërkombëtare”.

Pjesa më e madhe e hapësirave jo-sportive të stadiumit dhe anëve përreth zotërohen dhe menaxhohen nga privatët.

Lexoni gjithashtu:

Shqipëria përballë Andorrës, kuqezinjtë nisin sot kualifikueset për kampionatin botëror, Reja apel për përqendrim

Kualifikueset e “Katar 2022”, Andi Lila: Reja të shohë edhe futbollistët e kampionatit tonë