Mbajti peng 15 persona nën kërcënimin e sëpatës, si u ekzekutua agresori në Zvicër

Policia në Zvicër ka qëlluar për vdekje një burrë të armatosur me sëpatë dhe thikë, i cili mori peng 15 pasagjerë në një tren mbrëmjen e së enjtes.

Pengmarrësi, thuhet se ishte një azilkërkues 32-vjeçar nga Irani, hipi në një tren lokal pranë Yverdon.  Ai e detyroi shoferin të ndalonte trenin dhe të bashkohej me pasagjerët në vagon.

Oficerët sulmuan trenin dhe “plagosën për vdekje” burrin pasi ai i sulmoi ata, thonë raportet e policisë. Të gjithë pengjet u liruan të padëmtuar.

Sipas mediave lokale, autoritetet u lajmëruan nga pasagjerët në tren dhe më shumë se 60 oficerë ishin të pranishëm. Policia, duke përfshirë një njësi speciale nga Gjeneva, rrethoi trenin dhe kaloi disa orë duke u përpjekur të fliste me burrin në anglisht dhe farsi, pa sukses.

Natën vonë, kur panë pengmarrësin duke u larguar nga pasagjerët, ata sulmuan trenin duke përdorur granata trullosëse. Sipas njoftimeve të policisë, burri sulmoi policinë, në atë moment ata përdorën armët e tyre për të mbrojtur pengjet dhe veten e tyre dhe pengmarrësi u qëllua për vdekje.

Policia thotë se motivi i marrjes së pengjeve është i paqartë. Një pasagjer në tren tha se autori dukej “shumë i stresuar”. Raportet lokale thonë se pengjet dhe familjet e tyre po mbështeten nga departamenti psikologjik i shërbimit shëndetësor zviceran.

Dihet pak për burrin, përveç se ai ishte me origjinë nga Irani dhe ishte caktuar në një qendër azilkërkuesish në Neuchatel. Dramat e pengjeve janë të rralla në Zvicër, por më parë kanë ndodhur në banka dhe biznese. Në janar 2022, punonjësit në një firmë prodhuese të orëve u morën peng dhe u detyruan të hapnin një kasafortë.

LEXONI GJITHASHTU:

• Dyshohet se shkroi letrën kërcënuese ndaj vetes, KLGJ pezullon gjyqtaren e Tiranës
• “112 sulme ndaj policisë së Kosovës”, Sveçla: Serbia etje për luftë, po na kërcënon