Qyteti i Lushnjës përjetëson ikonën e muzikës shqiptare, Vaçe Zela

Prej 6 vitesh nuk jeton më, por është ende e aftë të mbledhë turma dhe adhurues pranë vetes.

Edhe pse e derdhur në bronz dhe e palëvizshme, Vace Zela tërheq ende vëmendjen e qytetarëve, të cilët qëndrojnë në radhë për të bërë një foto me të.

Që prej 19 janarit monumenti i Vaçe Zelës është vendosur në parkun e qytetit të Lushnjes, aty ku u pikas për herë të parë si këngëtare, 70 vite më parë, kur ishte vetëm 10 vjeç.

Ndonëse kanë kaluar shumë vite nga shkëlqimi i saj, Vaçe Zela mbetet krenaria e qytetit.

Iniciativa për realizimin e kësaj vepre ishte e këngëtarit lushnjar Luan Manahasa, ndërsa përjetësimin në skulpturë e ka realizuar skulptori Arben Bajo me ndihmën e Bashkisë Lushnje.

“Në qytetin e lindjes duhet të kishte diçka të veçantë, dhe e veçanta ka filluar që me dhënien e emrit të qendrës së artit, Vaçe Zela. Kemi një bust të saj brenda në qendër të artit. Të gjithë e donin jasht, të këndonin, të shikonin Vaçen ashtu siç ajo ka kënduar këngët e saj”, është shprehur nënkryetari i bashkisë së Lushnjes Gentian Nushi.

Edhe për qytetarët e qytetit të Lushnjes, Vaçe Zela gjithmonë një ikonë e paharrueshme e muzikës shqiptare.

“Është një figurë e paharrueshme”, është shprehur një banor i qytetit.

Tashmë Vace Zela është gdhendur në përjetësi, jo vetëm si zë në zemrat e të gjithë shqiptarëve, por edhe si imazhi i një krenarie të madhe.