Rusia ristrukturon trupat, Kremlini riaktivizon bazat ushtarake në Moskë e Leningrad

Presidenti rus Vladimir Putin ka nënshkruar së fundmi dy dekrete që zyrtarisht riaktivizojnë distriktet ushtarake në Moskë dhe Leningrad, në përpjekje për të ristrukturuar dhe reformuar ushtrinë ruse.

Sipas Institutit për Studimin e Luftërave, lëvizja ka dy objektiva paralelë: forcimin e përpjekjeve të Moskës për të konsoliduar kontrollin në Ukrainë dhe përgatitjen për një luftë eventuale kundër NATO-s në të ardhmen.

Tani, distrikti ushtarak i Leningradit do të shtrihet përgjatë kufirit veri-lindor me NATO-n; ndërsa ai i Moskës në kufi me Ukrainën dhe Poloninë, gjë që i mundëson Rusisë dy gjëra: gatishmërinë përballë NATO-s dhe kontrollin e luftës në Ukrainë.

Deri më sot, shumica e territorit rus kishte rënë nën kontrollin e Distriktit Ushtarak Perëndimor, i formuar në 2010-n nga shkrirja e dy distrikteve origjinale.

“Putin e ka thënë se krijimi i Distriktit Ushtarak të Leningradit ka qenë i nevojshëm që pasi Finlanda u bashkua me NATO-n në 2023-shin, duke sinjalizuar se Kremlini synon ta përdorë atë për t’i bërë ballë Aleancës”, thuhet në analizën e Institutit për Studimin e Luftërave.

Sipas tij, Moska ka nisur operacione për mbledhjen e informacioneve mbi Moldavinë, shtetet baltike, Danimarkën dhe Finlandën, me qëllim krijimin e kushteve të ngjashme që çuan në pushtimin e Ukrainës.

Edhe shërbimi estonez i inteligjencës ka paralajmëruar se situata në Evropë dhe përgjatë kufijve të Estonisë do të varet nga fitorja që Ukraina, me ndihmën e aleatëve, do të arrijë ndaj Rusisë.

LEXONI GJITHASHTU:

• Zelensky nga Tirana: Rusia nuk do të ndalet vetëm në Ukrainë, vendet që rrezikojnë
• Zelensky: Luftën e filloi një person i vetëm, paqen duhet ta vëmë të gjithë bashkë