“Dënim shembullor kush prek votën”, Meta: Kush deformon vullnetin e shqiptarëve është armik i republikës

Presidenti Meta zgjodhi Durrësin për të prezantuar nismën e tij për mbrojtjen e zgjedhjeve. Duke ftuar të gjithë qytetarët të denoncojnë në faqen e presidencës krimin zgjedhor, kreu i shtetit u shpreh se kushdo që prek votën është armik i republikës dhe meriton një dënim shembullor.

“Kushdo që teton të prekë votën e lirë, nuk do të ketë shpëtim. Do të ketë ndëshkim ë mrekullueshëm, spektakolar, siç e meriton një armik i republikës. Kush prek votën e lirë është armik i Republikës së Shqipërisë. Sepse degradimi i zgjedhjeve sipas modeleve të Shijakut, të Dibrës etj., na ka bërë të jemi aq mbrapa sa të ëndërrojmë zgjedhje si në Kosovë apo si në Maqedoninë e Veriut”, tha z. Meta.

Mbrojtja e procesit zgjedhor nga manipulimi, sipas kreut të shtetit, është në fakt mbrojtje e demokracisë dhe aspiratave evropiane të shqiptarëve.

“Në këtë nismë të re i ftoj të gjithë shqiptarët për të denoncuar krimin zgjedhor me moton: Të zgjedhjet, të mbrojmë pluralizmin, të mbrojmë demokracinë dhe të shpëtojmë të ardhmen evropiane të Shqipërisë që është vënë, për fat të keq në pikëpyetje”, u shpreh Presidenti Meta.

Meta u shpreh se konferencat nga Durrësi në kuadër të kësaj nisme do të jenë të përjavshme.