Presidenti Begaj: NATO dhe SHBA shpëtuan Kosovën dhe stabilizuan Ballkanin

Presidenti i Republikës, Bajram Begaj dha një mesazh në 25-vjetorin e nisjes e bombardimeve të NATO-s për çlirimin e Kosovës nga gjenocidi serb.

Përmes një postimi në rrjetet sociale, Begaj shprehu falenderime ndaj Aleancës dhe Shteteve të Bashkuara të Amerikës për “aktin historik për shqiptarët dhe rajonin e Ballkanit”. Kreu i Shtetit përkujtoi me nderim heronjtë e UÇK-së dhe viktimat e luftës në Kosovë.

“Faleminderit, NATO! Faleminderit, SHBA! 25 vjet më parë, më 24 mars 1999, NATO ndërhyri për t’i dhënë fund gjenocidit serb në Kosovë. Sot ne përkujtojmë një ngjarje me rëndësi historike për Kosovën dhe të gjithë shqiptarët. Ndërhyrja e NATO-s, e udhëhequr nga SHBA-ja, i dha të drejtë kauzës së lartë të popullit të Kosovës dhe përpjekjeve për liri e pavarësi. Urtësia politike, largpamësia strategjike dhe vendosmëria e Aleancës për të mos qëndruar indiferente ndaj spastrimit etnik dhe dhunës jo vetëm e shpëtuan Kosovën, por krijuan një kornizë të re të sigurisë për të gjithë rajonin”, shprehet Begaj.