Zv.ministrja Romina Kuko: E motivuar pavarësisht renditjes si e 26-ta në listën e Tiranës

Pavarësisht renditjes në një pozitë jo shumë të favorshme në listën e kandidatëve për deputetë të Partisë Socialiste, zëvendësministrja e Brendshme Romina Kuko thotë se ndihet e motivuar.

Në intervistë me gazetaren Bruna Çifligu, Kuko e konsideroi listën e PS-së si “listë shprese” ndërsa i krahasoi listat e opozitës si “lista magazine relikesh”.

PS e ka kandiduar si të 26-ën në listën e Tiranës Znj. Romina Kuko. E pyetur nëse e favorizon pozicioni i zëvendësministres në fushatën për t’u bërë kandidate, Kuko tha se ky është një post i funksionit publik dhe “nuk ka ndonjë influencë ndaj asaj që mund t’i ofrosh qytetarëve”.

Sipas zëvendësministres PS e meriton një mandat të tretë pasi ajo i ka dhënë provat se mundet të qeverisë denjësisht vendin. Ajo mori si shembuj situatat e vështira të pas tërmetit të 26 nëntorit 2019 dhe ato të pandemisë gjatë vitit 2020-2021.

“Qasja sociale që PS ka… menaxhimi i tërmetit me rindërtimin, reforma administrativo-territoriale, reforma në drejtësi […] mendoj se qytetarët mund ta bëjnë dallimin, mes një partie që i ka dhënë provat dhe po rifreskon veten, pra nuk po e riciklon vetëveten, apo alternativave të tjera që janë provuar në qeverisje dhe thjesht po vijnë si listë ricikluese,” – tha Kuko.

Zëvendësministrja e konsideroi të marrit me politikë si detyrë të çdo qytetari. Duke e konsideruar veten si person me ndjesi të drejtësisë sociale, ajo tha se do të vijonte të merrej me politikë pavarësisht rezultatit në zgjedhjet e 25 prillit.