Pas shkarkimit nga Banka e Shqipërisë, Arben Malaj angazhohet me Partinë Agrare Ambientaliste

Pak javë pasi u largua mes polemikash nga bordi i Bankës së Shqipërisë, ish-ministri socialist Arben Malaj ka bërë të ditur se do t’i rikthehet angazhimit politik.

Por, kësaj radhe duket se orientimi i tij do të kalojë në krahun opozitar. Në një postim në rrjetin social, Malaj ka bërë të ditur se ka pranuar një ftesë nga Partia Agrare Ambientaliste për t’i përgatitur kësaj të fundit strategjinë e zgjedhjeve të ardhshme parlamentare dhe lokale.

Partia Agrare Ambientaliste është pjesë e koalicionit opozitar në Shqipëri, e angazhuar për rrëzimin e qeverisë Rama.

Malaj e ka akuzuar mazhorancën për shkarkimin e tij nga detyra në Bankën e Shqipërisë.

Më tej në postimin e tij, Malaj ka folur për vlerat e të gjelbërve në politikën europiane dhe dëshirën e tij për të dhënë kontribut në kauzën e tyre.