”Shqipëria ka rënë me 9 vende më poshtë për lirinë ekonomike”, Meta publikon raportin e “Heritage”

Presidenti i vendit, Ilir Meta ka publikuar raportin e fondacionit botëror “Heritage” dhe shkruan se ‘Shqipëria ka rënë nëntë vende më poshtë në renditjen për lirinë ekonomike, krahasuar me një vit më parë’.

Sipas kreut të shtetit kjo “rrëshqitje e frikshme në pikiatë e lirisë ekonomike, është pasojë e drejtpërdrejtë e cenimit brutal të të drejtave të pronësisë dhe mosfunksionimit të sistemit gjyqësor”.

Kështu, ai e cilëson raportin thellësisht negativ.

“Konfirmon qëndrimet e vazhdueshme publike, që kam shprehur edhe me dekrete, në mbrojtje të konkurrencës së lirë”,  shprehet kreu i shtetit nëpërmjet një postimi në Facebook.

Meta thekson është urgjente ç’kapja e shtetit, Kuvendit, qeverisë dhe e pushtetit gjyqësor nga oligarkët dhe interesat okulte.

Në fund të reagimit të tij, ai nënvizon se referendumi i 25 prillit është një mundësi historike për të nxjerrë nga “intubimi” edhe lirinë ekonomike, krahas të gjitha lirive të tjera, që gëzojnë qytetarët në një vend plotësisht europian.