Solli në jetë fëmijën ndërsa ishte në intubim, 22-vjeçarja ndërron jetë nga COVID-19

Një 22-vjeçare në intubim prej 3 javësh, ka ndërruar jetë për shkak të COVID-19. Lajmi konfirmohet nga Ministria e Shëndetësisë, pyetur nga Euronews Albania.

E reja S.K., nga Korça, për shkak të gjendjes së rënduar shëndetësore ka lindur me operacion foshnjën e saj, në momentin që ajo ka qenë e intubuar.

Sipas Ministrisë së Shëndetësisë fëmija është në gjendje të mirë shëndetësore.

22-vjeçarja ka ndërruar jetë në spitalin ‘Shefqet Ndroqi’, apo siç quhet ndryshe COVID-2.

Infektimi me COVID i moshave të reja është një shqetësim i shprehur prej kohës nga mjekët në spitalet COVID, por jo në pak raste ka pasur edhe fatalitete.

Pak javë më parë një 17-vjeçar nga Elbasani, pa sëmundje të tjera shoqëruese humbi jetën pasi ishte infektuar me COVID-19, ndërsa disa ditë më parë një tjetër 22-vjeçare ndërroi jetë për shkak të virusit.