Ambasadori Soreca kërkon që për verifikimin e listave të kandidatëve të zbatohet plotësisht ligji i dekriminalizimit

Ambasadori i Bashkimit Evropian në Tiranë, Luigi Soreca, i bëri thirrje mbrëmjen e sotme Komisionit Qendror të Zgjedhjeve dhe Prokurorisë që “të zbatojnë plotësisht ligjin e dekriminalizimit” në procesin e shqyrtimit të listave të kandidatëve për deputetë.

Soreca e bëri thirrjen e tij përmes një postimi në Twitter, i cili ishte i pari që pasi partitë politike dorëzuan në KQZ listat e kandidatëve.

“Partitë politike tani kanë prezantuar listat e tyre për zgjedhjet e 25 prillit në Shqipëri. Tani është deri në dorë të KQZ-së që në konsultim me Prokurorinë e Përgjithshme, të verifikojnë kandidatët. Ligji i dekriminalizimit duhet të zbatohet plotësisht dhe standardet e larta të integritetit për të gjithë kandidatët duhet të plotësohen,” – shkroi Soreca.