Interi përmbys Udinesen në transfertë dhe shkëputet 14 pikë nga Milani

Interi vijon të konfirmojë nga dita në ditë se asnjë prej ekipeve italiane nuk mund të rivalizojë në fushë, duke regjistruar një tjetër fitore, këtë herë ndaj Udinezes. Të besuarit e Simone Inzaghit hasën jo pak vështirësi ndaj një kundërshtari që synimin e vetëm ka qëndrimin në elitën e futbollit italian, pasi ndodhet 2 pikë larg zonës së ftohtë.

Pjesa e parë edhe pse prodhoi disa raste për miqtë, golin do ta gjente Udinese me anë të Samardziç, me këtë të fundit që me pak fat e ndali topin në rrjetë. Në fraksionin e dytë zikaltrit u kundërpërgjigjën shpejt. Në minutën e 55 erdhi goli i barazpeshës me autor Hakan Calhanoglu që ekzekutoi saktë një 11 metërsh, pas ndërhyrjes së parregullt nga portieri kundërshtar në dëm të francezit Thuram. Sulmet e Interit u shtuan më tepër në minutat në vijim, por goli do të shënohej në limite nga Frattesi.

Lautaro Martinez goditi nga jashtë zone ndërsa topi i pritur nga portieri Okoye gjeti Frattesin që me portën thuajse bosh e dërgoi në rrjetë duke përmbysur shifrat. 1-2 për Interin i cili vijon rrugëtimin i pashqetësuar drejt titullit kampion, 14 pikë para Milanit, që është dhe ndjekësi më i afërt.

LEXONI GJITHASHTU:

• Interi jashtë Champions League, penalltitë “tradhtojnë” zikaltrit
• Çerekfinalet e Champions League, sot dy supersfida që garantojnë spektakël