Të shtëna me armë në Qendrën për Punë Sociale në Ferizaj, vritet një grua

Një grua është vrarë sot në Qendrën për Punë Sociale në Ferizaj pas disa të shtënave me armë zjarri.

Lajmin e ka konfirmuar zëdhënësi i policisë për rajonin e Ferizajt, Kanun Veseli, shkruan Gazeta Express.

“Me datën 12.04.2024 në ora 14:40 kemi pranuar një informatë se në Qendrën për Punë Sociale në Ferizaj ka të shtëna me armë zjarri.

Për pasojë nga të shtënat e armës së zjarrit një person i gjinisë femërore ka ndërruar jetë në vendin e ngjarjes. Kjo është konfirmuar nga mjekët kujdestarë, ndërsa është plagosur një person i gjinisë mashkullore, i cili është dërguar në Qendrën Emergjente në Ferizaj.

I dyshuari pasi ka shtënë me armë zjarri është larguar në drejtim të panjohur.

Ekipe të policisë menjëherë kanë rrethuar zonën dhe në ora 15:15 kanë arritur që të arrestojnë të dyshuarin e kësaj ngjarje.

Ekipe të hetuesve dhe krimeve janë në vendin e ngjarjes, të cilët janë duke e ekzaminuar vendin e ngjarjes, ndërsa për të gjitha veprimet policore është njoftuar prokurori i shtetit”, tha zëdhënësi i policisë për rajonin e Ferizajt.

LEXONI GJITHASHTU:

• Maqedonci: NATO të trajtojë me seriozitet lëvizjet e Serbisë në kufirin me Kosovën
• Banka Botërore parashikon rritje ekonomike në Kosovë dhe rajon