I zhdukur rreth një javë më parë, gjyshja dorëzon 3-vjeçarin në prokurori

Fëmija 3-vjeçar në qytetin e Durrësit i zhdukur rreth një javë më parë, është dorëzuar në prokurori. Ka qenë gjyshja ajo që e shoqëruar nga një avokat e ka dorëzuar fëmijën në prokurori.
Lidhur me ngjarjen janë arrestuar R. Gj. (gjyshi) dhe A. S. (vëllai i gjyshes), të dyshuar si bashkëpuntorë për rrëmbimin e 3-vjeçarit.

Ngjarja ka ndodhur më 16 prill, ka qenë e ëma e të miturit ajo e cila ka bërë denoncimin në polici, ku ka thënë se 3-vjeçari është marrë nga gjyshërit dhe nuk është kthyer më.

Vogëlushi është në gjendje të mirë shëndetësore dhe tashmë u bashkua me nënën e tij.

Njoftimi i policisë:

Komisariati i Policisë Durrës ka vijuar punën kërkimore dhe hetimore, për gjetjen e 3-vjeçarit dhe për dokumentimin e plotë të kësaj ngjarjeje, për të cilën deri tani janë arrestuar shtetasit R. Gj. (gjyshi) dhe A. S. (vëllai i gjyshes), të dyshuar si bashkëpuntorë për rrëmbimin e 3-vjeçarit.

Në këtë kuadër janë kryer një tërësi veprimesh hetimore dhe kontrolle të shumta në Durrës, Has, Kukës dhe Tiranë.

Si rezultat i presionit policor, kërkimeve të shumta dhe negociatave, sot është vetëdorëzuar shtetasja B. Gj., së bashku me nipin e saj 3-vjeçar, të cilin e mori nëna e tij, në gjendje të mirë shëndetësore.

Në drejtimin e Prokurorisë pranë Gjykatës së Shkallës Parë të Juridiksionit të Përgjithshëm Durrës, vijon puna hetimore për sqarimin e plotë të rrethanave dhe dokumentimin e plotë ligjor të rastit.

• Zhdukja e 3-vjeçarit|Kikia: Gjyshërit nga Durrësi e rrëmbyen nipin, ka pësuar traumë
• Zhdukja e 3-vjeçarit në Durrës, gjykata jep masat e sigurisë për gjyshin dhe kunatin