Revolta e juristit: Sindikatat në Shqipëri u bënë si partitë, zgjatime të tyre

Juristi Gent Serjani është shprehur se sindikatat në Shqipëri janë bërë si partitë politike dhe në njëfarë mënyre janë zgjatime të tyre.

Komentet Serjani i bëri në emisionin “Now me Erla Mëhillin” në Euronews Albania, ku tha se sindikatat në vendin tonë kanë të njëjtën strukturë me ato të para viteve 90-të.

Ai foli edhe për sindikatat e reja, që sipas tij, kanë një ndryshim nga ato të vjetrat, pasi janë në mbrojtje të punonjësve dhe kanë organizuar edhe protesta për të drejtat e tyre.

“Ne sot nuk kemi një mbrojtje nga ana e institucioneve dhe qeverisë ndaj punëtorëve. Këto janë shqetësimet kryesore dhe unë iu bashkova sot sindikatave të reja. Sepse po të shohim historikun e sindikatave në vendin tonë, më duket sikur është e njëjta gjë me atë që ka ndodhur me partitë politike në vendin tonë.

Pas 90-ës u krijuan 2 parti që kishin të njëjtën përbërje me të njëjtët persona që ishin po pjesë e partisë së mëparshme. Edhe sot sindikatat kanë thuajse të njëjtën strukturë me ato të para viteve 90-të.

Një sindikatë bëhet më e fortë kur vjen një forcë politike dhe tjetra nuk vjen në pushtet forca tjetër politike. Edhe sindikatat po të shohim janë zgjatime të partive politike. Ndërsa sindikatat e reja kanë krijuar një marrëdhënie ndryshe me punonjësit. I kanë mbrojtur dhe i mbrojnë, si dhe kanë protestuar për të drejtat e punonjësve”, tha Serjani.

LEXONI GJITHASHTU:

• Unioni i Sindikatave tubim para Kryeministrisë për të drejtat e punëtorëve
• Greva e Sindikatave, radhë të gjata automjetesh në Kapshticë