“Kohë e artë” për bizneset- BSH: 94% e ndërmarrjeve raportojnë fitim

Bizneset në vend po kalojnë një situatë të mirë. Kriza e cmimeve dhe kreditë e shtrenjtuara duket se janë tejkaluar. Në një vrojtim i Bankës Qendrore për gjendjen e tyre financiare dhe ngarkesën me borxh, 94% e sipërmarrjeve raportojnë fitim.

Po ashtu, shumica dërrmuese e bizneseve deklarojnë se ecuria e shitjeve dhe e rezultatit financiar vlerësohen pozitive krahasuar me gjashtëmujorin paraardhës.

Pritjet mbeten optimiste edhe për muajt në vazhdim, teksa ndërmarrjet e vogla dhe të mëdha presin rritje të mëtejshme të shitjeve.

Po ashtu edhe pesha e kompanive që kanë hua për të paguar rezulton me rënie 2%. Këtë vit, rreth 36% e subjekteve deklarojnë se kanë aktualisht hua për të paguar.

Sektori i shërbimeve ka pësuar uljen me të madhe të huave që ka për të paguar e ndjekur nga tregtia. Kjo ecuri lidhet direkt me ecurinë e sektorit të turizmit.

Rreth 87% e ndërmarrjeve e konsiderojnë të përshtatshëm nivelin e tyre të huamarrjes, por ndërmarrjet e vogla shfaqin kërkesë më të lartë për financim.

Megjithatë, nuk mungojnë edhe problemet, teksa bizneset raportojnë për rritje të kostove të prodhimit dhe me gjetjen e stafit të kualifikuar.