Vrasja e policit në Fier, Balla: Autori të dorëzohet! Të ngulitet në mendjen e…

Ministri i Brendshëm, Taulant Balla, ka reaguar lidhur me ngjarjen e rëndë të ndodhur gjatë ditës së sotme në Fier, ku u vra një efektiv i Forcave Shqiponja, Novruz Cenalia.

Përmes një deklarate për mediat, Balla i bëri thirrje autorit të dyshuar të krimit dhe familjarëve të tij që ai të dorëzohet.

Balla tha gjithashtu se do të bëjnë çdo përpjekje për të ngulitur në mendjen e çdokujt që nuk duhet ngritur dora ndaj asnjë punonjësi të Policisë.

“Është në detyrën e Policisë së Shtetit që të bëjë sa më shpejt të jetë e mundur zbardhjen e ngjarjeve kriminale. Në rastin që ju referoheni në Fier, dua të shpreh dhimbjen që ndiej për humbjen e jetës së një punonjësi të Policisë dhe nxis punonjësit e Policisë së Shtetit për të bërë të mundur arrestimin sa më shpejt të autorit.

Do bëjmë gjithçka që në këtë vend të ngulitet mirë në mendjen e kujtdo që është e papranueshme që të ngesh dorën ndaj një punonjësi të Policisë e më rëndë se kaq të përdorësh armën ndaj një polici. Nuk dua të hyj në interpretimin e informacioneve paraprake, por gjithësesi përgjegjësia që bie mbi Policinë është pjesa për identifikimin e mënjëhershëm të autorëve.

Kam besim që Forca Kombëtare e Sigurisë, forcat RENEA dhe të gjitha forcat e Policisë që janë në këtë proces kërkimi, do konkludojnë dhe këtu dua t’i bëj një thirrje familjarëve dhe personit mbi të cilin rëndon akuza, të dorëzohet”, tha Balla.

LEXONI GJITHASHTU:

• “Doni ta kapni”-Balla përplaset me Nokën për Magjistraturën: E kanë partnerët
• Vrasja e efektivit, drejtori i Policisë së Fierit: Autori të dorëzohet, do reagojmë!