Përcillet sot në banesën e fundit, kolegët nderojnë policin që u vra në Fier (VIDEO)

Efektivi i forcave ‘Shqiponja’, 28-vjeçari Novruz Cenalia, i cili u vra dy ditë më parë në Fier nga 23-vjeçari Azgan Mërnica, do të përcillet ditën e sotme për në banesën e fundit.

Në hollin e Teatrit Bylis në Fier është vendosur arkmorti me trupin e pa jetë të efektivit të policisë, ku do të kryhen homazhe nga familjarë, kolegë, qytetarë dhe autoritetet, për ti dhënë lamtumirën e fundit.

Më pas arkmorti me trupin e tij do të përcillet në banesën e fundit, në varrezat e fshatit Baltëz.

Efektivi i policise Novruz Cenalia u vra dy ditë më parë në fshatin Baltëz pas një konflikti të çastit me 23 vjecarin Azgan Mernica, i cili pas kryerjes së kesaj vrasjeje është ende në arrati.

Prej dy ditësh forcat e Policisë, forcat speciale dhe RENEA kanë vijuar kërkimet për gjetjen e autorit, duke u shtrirë në disa qytete të jugut të vendit.