Efikasiteti i vaksinave, ekspertja Nelaj: Të moshuarit të kenë kujdes, duhet rreth një muaj për antitrupat

Ekspertja e vaksinimit në Institutin e Shëndetit Publik Erida Nelaj tha për Euronews Albania se të moshuarit që i nënshtrohen aktualisht vaksinimit masiv me vaksinën kineze që të tregohen të kujdesshëm dhe të respektojnë masat anti-COVID edhe pasi kanë marrë dozën e parë të vaksinës, pasi duhet rreth një muaj të nisë prodhimi i antitrupave.

Ajo shprehu shqetësimin lidhur me grumbullimin masiv të të moshuarve jashtë qendrave të vaksinimit pasi siç tha, po hedhin poshtë sakrificën e një viti në izolim dhe rrezikojnë seriozisht të infektohen. Mjekja këshilloi që secili prej të moshuarve të paraqitet për të bërë vaksinën vetëm pasi të ketë marrë konfirmimin e mjekut të familjes për datën dhe orën.

Znj. Nelaj u shpreh optimiste se me ritmet e vaksinimit masiv mund të arrihet një imunizim i mjaftueshëm i popullsisë përpara afatit të parashikuar.

E pyetur lidhur me efektet anësore të vaksinave, specifikisht Astrazeneca, e lidhur me disa raste të mpiksjes së gjakut, ekspertja e vaksinimit u shpreh se në vendin tonë nuk ka pasur ndonjë rast të tillë, ndërsa shtoi se efektet e zakonshëm pas vaksinës janë temperatura apo këputja e trupit, që sipas saj janë fare normale, madje të nevojshme për të kuptuar që vaksina ka nisur veprimin në trup.