“Gati të përfshihem në politikë”- Argita Malltezi parlajmëron kandidimin në zgjedhje

Tashmë ajo nuk e fsheh më ambicien e saj. Argita Malltezi është e gatshme të aktivizohet në jetën politike të vendit. Deklaratën, vajza e ish-kryeministrit Berisha e bëri gjatë një konference me gazetarët, ku renditi provat që sipas saj shfajësojnë babain e saj dhe bashkëshortin Jamarbër Malltezi nga akuzat që i ka ngritur SPAK në lidhje me privatizimin e kompleksit “Partizani”

“Unë shpresoj që e gjithë situata në vend të bjerë në hullitë e ligjshmërisë dhe proceset të ndjekin rrugën e tyre ligjore, përfshirë edhe ato politike që kanë shinat e tyre të ligjshmërisë. Sigurisht që do të qëndroj nëse mendoj që është një padrejtësi ndaj të cilës duhet qëndruar. Aktualisht në qëndrojmë në këtë formë që po e bëj sot, por mund ta përshkallëzoj duke marrë vendime të tjera drejt politikës”, tha Malltezi.

Gjatë kësaj dalje për mediat, bashkë me avokatët e Sali Berishës, Argita Malltezi theksoi se ka tentative nga organet e drejtësisë për të penguar dhe zvarritur ankimin e kësaj çështje në gjykatat ndërkombëtare.

Kjo është dalja e disatë e Argita Malltezit pas arrestimit të babait të saj Sali Berisha, madje në protestat e fundit të organizuara para kryeministrisë dhe bashkisë është bërë pjesëmarrëse e rregullt.

LEXONI GJITHASHTU:

• Berisha dorëzon në GJKKO kërkesën për përjashtimin e gjyqtares Irena Gjoka
• Ish-eurodeputeti në mbështetje të Berishës: S’mund të arrestohet pa vendim fajësie