Kualifikimi i kandidatëve të BKH, ambasada amerikane: Mbështesim SPAK-un dhe ata që luftojnë krimin e korrupsionin

Ambasada Amerikane në Tiranë ka përshëndetur kualifikimin e kandidatëve të Byrosë Kombëtare të Hetimit.

Nëpërmjet një statusi në Twitter ambasada amerikane shkruan se SHBA-të do të vijojnë që të mbështesin Prokurorinë e Posaçme dhe ata që i përgjigjen thirrjes së detyrës për të luftuar korrupsionin dhe krimin e organizuar.

“Urime dhe fat të mbarë burrave dhe grave që përfunduan me sukses procesin rigoroz të aplikimit dhe tani do të fillojnë trajnimin për Byronë Kombëtare të Hetimit. Shtetet e Bashkuara të Amerikës do të vazhdojnë të mbështesin SPAK-un dhe ata që i përgjigjen thirrjes së detyrës për të luftuar korrupsionin dhe krimin e organizuar në emër të popullit shqiptar”, shkruan ambasada.

“Presim së shpejti një thirrje tjetër për hetues të BKH-së, për të forcuar më tej këtë institucion të ri”, thuhet më tej në postim.

28 kandidatë janë pjesë e Byrosë Kombëtare të Hetimit, pasi kaluan fazën e fundit të përzgjedhjes.

Nga verifikimet e Komisionit të Posaçëm të Verifikimit të Pasurisë dhe Figurës, kushtet e sigurisë nuk i kaluan 9 kandidatë nga 37 gjithsej.

Hetuesit do t’i nënshtrohen trajnimit me një sërë modulesh vlerësimi që duhen kaluar përpara se të certifikohen.

Lexoni gjithashtu:

Hetuesit e BKH-së, 28 kandidatë kalojnë kushtet e sigurisë