Sekuestrohen llogaritë bankare të kompanisë italiane, pastronte paratë në Shqipëri

Llogaritë bankare të një shoqërie italiane janë sekuestruar me kërkesë të Prokurorisë Tiranë nën dyshimin për pastrim parash.

Përmes një njoftimi për mediat Prokuroria bëri me dije se u sekuestruan llogaritë bankare të shoqërisë ‘N.’ shpk, themeluar nga shtetasi Italian B.R. më 10.01.2022, nën hetim për veprën penale ‘Pastrimi i produkteve të veprës penale apo veprimtarisë kriminale’.

Në kuadër të hetimeve të procedimit penal nr.3695 të vitit 2024, shoqëria në fjalë, e cila ushtron aktivitet në ‘Ndërtim, prodhim, mirëmbajtje, riparim dhe mirëmbajtje ne terren të avionëve’ rezulton me një aktivitet dhe transferta të dyshimta.

Nga hetimet e prokurorisë së Tiranës, rezulton se shtetasit e përfshirë T.G., J.L., dhe B.R, janë dënuar në vitin 2016 nga Gjykata e Shkallës së Parë në Itali për mashtrim në përfitimin e fondeve publike dhe se zotërojnë dhe drejtojnë disa biznese atje në fushën e aeronautikës.

“Duke marrë në konsideratë kërkesën për transferimin e fondeve jashtë vendit dhe mungesën e informacionit lidhur me ecurinë e likuidimit të detyrimeve, ndodhur edhe përpara rastit të ngutshëm, pasi ekziston rreziku që këto pasuri, të cilat dyshohen si produkt i veprimtarisë kriminale, të transferohen apo të fshihen, është e nevojshme kryerja e sekuestrimit e llogarive bankare të shoqërisë “N.” shpk, në vlerat: 1,539,490 ALL;  20,348.24 EUR; dhe 479.820,56 USD”, bën me dije Prokuroria e Tiranës.

LEXONI GJITHASHTU:

• Mashtrimi me kreditë, Prokuroria sekuestron llogari bankare në vlerë 10 mln €
• Skandali me mikro-kreditë, prokuroria e Tiranës urdhër-arrest për 9 persona