Plarent Ndrecaj sqaron në Rinvote akuzat ndaj tij për abuzime me detyrën

Në emisionin Rinvote të Euronews Albania, aktivistet Marjan Koçeku dhe Ergisa Bejkollari e përballën kandidatin për deputet të Partisë Socialiste, Plarent Ndreca, me pyetje rreth figurës së tij.

Fillimisht, Bejkollari u shpreh se “Ndreca është i kompromentuar deri sa është shkarkuar si Sekretar i Përgjithshëm në Ministrinë e Arsimit në vitin 2017 për abuzim me detyrën”.

Nga ana e tij, kandidati i PS u përgjigj se “ka pasur vetëm akuzë politik nga ministrja teknike e emëruar nga PD (Mirela Karabina) para zgjedhjeve të kaluara parlamentare” dhe që “nuk u provuan kurrë”.

“Nuk e di nëse jam kallëzuar apo jo nga ish-ministrja që ishte një turp i shtetit shqiptar dhe unë kam qenë garant i administratës publike nga një person i paaftë,” – tha Ndreca.

Ndërkohë aktivistja tjetër, Koçeku ndërhyri duke thënë se ndaj kandidatit të PS-së “ka pasur kallëzim nga Kontrolli i Lartë i Shtetit për një dëm ekonomik prej 780 milionë euro”.

Ndreca e cilësoi edhe këtë kallëzim si “politik” duke thënë se “kjo dëshmohet edhe nga kandidimi i ish-kreut të KLSH-së, Bujar Leskaj nga PD në Vlorë”.

“Ky që sot është kandidat i PD në Vlorë (Bujar Leskaj), ka bërë një kallëzim penal që është pushuar tani. Nuk jam marrë kurrë në hetim nga prokuroria kaq e pabazë ka qenë akuza,” – përfundoi kandidati i PS.