Bursa e Moskës ndalon tregtimin e dollarit dhe euros

Bursa e Moskës njoftoi të mërkurën se do të ndalojë tregtimin me dollarë dhe euro nga e enjtja, 13 qershor.

Njoftimi erdhi në të njëjtën ditë kur Shtetet e Bashkuara prezantuan një paketë të re sanksionesh kundër Rusisë.

Bursa e Moskës, Qendra Kombëtare e Kliringut dhe Depozita e Shlyerjes Kombëtare, të cilat veprojnë si ndërmjetës në tregtimin e dollarëve në tregun valutor rus, u përfshinë në listën e re të sanksioneve.

Sanksionet vijnë pasi udhëheqësit e G7 po përgatiten të mblidhen së shpejti në Itali për një samit ku prioritetet kryesore do të jenë rritja e mbështetjes për Ukrainën dhe rrëzimi i makinës luftarake të Rusisë.

Banka Qendrore e Federatës Ruse njoftoi gjithashtu se transaksionet duke përdorur dollarin dhe euron do të vazhdojnë të kryhen në tregun pa bursë.

SHBA ka sanksionuar më shumë se 4,000 biznese dhe individë rusë që nga fillimi i luftës, në një përpjekje për të mbytur fluksin e parave dhe armatimeve në Moskë.

LEXO GJITHASHTU:

• Çfarë dihet deri tani nga nëndetëset bërthamore të Rusisë të vendosura në Kubë
• Rusia zhvendos anijet luftarake pak milje larg SHBA, përfshirë nëndetësen bërthamore