Pse humbi Shqipëria? Rraklli: Bëmë shumë gabime taktike dhe individuale

Ish-lojtari Altin Rraklli, i ftuar në Euronews Albania ka dhënë arsyet pse Shqipëria nuk fitoi dot ndeshjen e parë në Euro2024.

Sipas tij arsyeja kryesore ishte se Shqipëria po përballej me kampionin në fuqi Italinë, por këto nuk ishin arsyet e vetme.

Rraklli shtoi se ekipi bëri shumë gabime si taktike, por dhe individuale.

“Mundësitë ishin për më shumë, ashtu dhe si erdhi loja, që ne e filluam ndeshjen me një gol shumë të shpejtë. Bëmë shumë gabime taktike pastaj, në vendosje dhe mënyra si u zhvillua loja, bëmë shumë gabime individuale, disa lojtarë nuk ishin në freskinë e vet më të mirë fizike, pra patëm shumë arsye pse nuk e mbajtëm dot rezultatin ashtu si ne pretendonim të ishte më e mira për ekipin tonë”, tha ai.

Ish-lojtari tha gjithashtu se një faktor që ndikoi në lojën e Kombëtares shqiptare ishte fakti që treguan shumë respekt për lojtarët italianë.

“Lojtarët dhanë maksimumin padiskutim. Në treguam respekt shumë të madh për Italinë, ky ishte problemi. E pamë që ne momentin që shënuam golin, ekipi u tërhoq direkt mbrapa, gjë që u dha mundësinë italianëve të na mbanin në presion gjatë gjithë kohës”, tha Rraklli.

LEXO GJITHASHTU:

• Euro 2024| Italia fiton ndeshjen kundër Shqipërisë me rezultatin 2-1
• BBC e UEFA jehonë golit të Shqipërisë ndaj Italisë: Më i shpejti në Europian