Ekskluzive| Euronews Albania siguron mesazhet e lëna nga Rama dhe Kurti për Kadarenë

Shqiptarët i dhanë këtë të mërkurë lamtumirën e fundit shkrimtarit të mirënjohur Ismail Kadare, i cili ndërroi jetë në moshën 88 vjeçare, mëngjesin e 1 korrikut.

Në një ceremoni shtetërore të mbajtur në Teatrin e Operas dhe Baletit, krerët më të lartë të shtetit të Shqipërisë dhe Kosovës, personalitete të shquara të kulturës dhe artit në botën shqiptare, miq dhe dashamirës të autorit, por dhe qytetarë të ndryshëm morën pjesë në homazhet e zhvilluara në nderim të shkrimtarit.

Mes të pranishmëve ishin dhe kryeministrat Rama e Kurti, ku krahas vendosjes së buqetave me lule lanë dhe një shënim në librin e lamtumirës për Ismail Kadarenë.

Gazetarja e Euronews Albania, Eksiola Shehu ka siguruar dhe fotot ekskluzive të mesazheve të lëna prej dy krerëve të qeverive në nderim të shkrimtarit.

Kryeministri Rama zgjodhi një mesazh të shkurtër, ku shkruan: “I the të gjitha, fli i qetë”.

Ndërkohë që mesazhi i lënë nga bashkëshortja e kryeministrit Rama, Linda Rama, ishte: “Ismail! Të privilegjuar të ishim bashkëkohës, të privilegjuar të të lexonim në shqip, Linda Rama”.

Rama ishte i vetmi që mbajti një fjalim gjatë ceremonisë së homazheve, ku sipas tij një gjë e tillë iu kërkua nga bashkëshortja e Kadaresë, Helena Kadare.

Sakaq kryeministri i Kosovës, nuk mundi të mbante dot një fjalim, por la një mesazh më të gjatë në librin e kujtimeve të shkrimtarit.

Në mesazhin e tij, lideri i Kosovës vlerëson maksimalisht figurën e Kadaresë dhe thekson se vepra e tij do të jetojë gjatë.

“Pikëllimi është i thellë sepse admirimi është i lartë. Historia me gjithë mitet, politika me gjithë intrigat, gjuha me gjithë bukurinë, me romanet dhe pozitë e Ismail Kadaresë u bënë dije dhe vetëdije për popullin tonë. Lum ne që e patëm kaq shumë. Vepra e tij do të rrojë gjatë, jo vetëm për ne.

Me mall e mirënjohje, Albin Kurti, Kryeministër i Republikës së Kosovës!”- shkruan Kurti.

LEXONI GJITHASHTU:

• Debati mbi vendvarrimin e Kadaresë, Rama: Jo me dëshmorët, as me vëllezërit Frashëri
• Botuesi i Kadaresë rrëfen momentet e fundit: Ambulanca s’kishte pajisje për ndihmë