Kërkuan lista të hapura, deputetët shprehen kundër marrëveshjes një ditë më pas

Pavarësisht dakordësisë së arritur një ditë më parë në grupin e dialogut për hapjen pjesërisht të listave për deputetë në zgjedhjet parlamentare të 2025-ës deputetë të majtë e të djathtë në oborrin e parlamentit janë shprehur kundër saj.

Ata kanë deklaruar se do të preferonin listat e hapura ku gara të ishte e drejtëpërdrejtë.

“Personalisht mendoj se do ishte më mirë të ishte sistem mazhoritar, të ballafaqohej secili kandidat me atë që ka përballë. Do ishte shumë interesante që gara të zhvillohej drejtpërdrejtë, por vendimi është i tillë.” –tha deputeti i PS, Xhemal Qefalia.

Nuk jam pro listavë të mbyllura, por jam për listat e hapura dhe ishte një sfidë në komision për të gjithë personat që kanë qenë tek tryeza që ishin për reformën zgjedhore, që më pas po këta persona të jenë tek listat e hapura.” –u shpreh i PS, Jurgis Çyrbja.

“Duhej mazhoritar, të ishtë një zonë zgjedhore. Kjo është çështje vullneti politik që brenda partive duhet edhe të bindesh. Nëse më pyet mua për preferencat e mia personale, doja mazhoritar të pastër, unë ashtu jam bërë deputet. Të gjithë këta me mbiemra të çuditshëm nga Braçe tek Llapa duhet të mësohen që të shkojnë të kandidojnë drejtpërdrejtë me njërzit.” –tha deputeti i Partisë Socialiste, Erion Braçe.

“Nëse do të ishte Shqipëria një zonë e vetme zgjedhore, me lista të hapura, unë do kandidoja edhe vtëm, pastaj do ishim në sfidë të hapur, që të zgjidhnin shqiptarët.” –deklaroi deputetja, Flutura Açka.