OSBE mbështet amendamentin e grave deputete për kuotat gjinore

Prezenca e OSBE-së në Shqipëri, ka reaguar në lidhje me amendamentin e Kodit të ri Zgjedhor të propozuar nga 26 deputete të parlamentit, ku kërkohet të sigurohet kuota gjinore.

OSBE thekson se çmon përparimin e jashtëzakonshëm që Shqipëria ka bërë në përfaqësimin e grave në jetën politike dhe shton se mbështet amandamentin e inicuar nga gratë deputete në Kuvendin e Republikës.

“Prezenca e OSBE-së në Shqipëri çmon përparimin e jashtëzakonshëm në fushën e barazisë gjinore që ka bërë Shqipëria gjatë viteve të fundit, veçanërisht për pjesëmarrjen dhe përfaqësimin e grave në jetën politike.

Ne mirëpresim përpjekjet aktuale ndërpartiake, të drejtuara nga gratë deputete, dhe shpresojmë që ndryshimet në Kodin Zgjedhor të garantojnë pozitën udhëheqëse të Shqipërisë në rajon e më gjerë në lidhje me përfaqësimin gjinor në parlame”, thuhet në njoftimin e OSBE.

Kujtojmë se 26 deputetë të PS dhe PD u bënë bashkë këtë të premte, ku firmosën një amendament për pjesën e listës së hapur 2/3, me qëllim ruajtjen e kuotës gjinore.

Po ashtu firmën e kanë hedhur edhe dy kryetarët e grupeve të PS, Bledi Çuçi dhe ai i PD, Gazment Bardhi.

Sipas amendamentit, 1 në 3 nga kandidatët fitues nga lista e hapur duhet të jetë grua.

Amendamenti propozon që lista e dytë e hapur do të përbëhet nga dy nënlista, një listë grash që garojnë mes tyre dhe një listë burrash që garojnë ndër vete.

LEXONI GJITHASHTU:

• Ndryshon Kodi Zgjedhori i dakordësuar, PS dhe PD propozojnë amendamentin për listat
• Arrihet marrëveshja PS-PD për “Zgjedhoren”, Euronews Albania siguron tekstin e plotë
• “Tym i bardhë për ‘Zgjedhoren’”, marrëveshja PS-PD: Ja si do zgjidhen deputetët