Funerali i liderit të Hamasit, Khamenei kërcënon Izraelin: Ditë sfiduese ju presin

Mijëra njerëz kanë marrë pjesë në funeralin e shefit politik të Hamasit, Ismail Haniyeh, i cili u vra në një sulm në Teheran të mërkurën.

Ceremonia mortore ka nisur në Iran, ku udhëheqësi suprem i vendit, Ayatollah Ali Khamenei, po kryen lutjet para varrosjes së liderit të Hamasit në Katar.

Mediat amerikane shkruajnë se lideri suprem ka urdhëruar një sulm të drejtpërdrejtë kundër Izraelit, të cilin e bëjnë përgjegjës për sulmin në tokën iraniane.

Khamenei paralajmëroi izraelitët se “ditë sfiduese janë përpara”, ndërsa frika për një konflikt më të gjerë në Lindjen e Mesme rritet.

Izraeli ende nuk ka pranuar autorësinë e vrasjes së liderit të Hamasit.

Megjithatë, kryeministri izraelit Benjamin Netanyahu tha se vendi i tij u kishte dhënë “goditje dërrmuese” armiqve ditët e fundit, duke përfshirë vrasjen e një komandanti të lartë të Hezbollahut në Liban, disa orë para sulmit të Teheranit.

“Ne jemi të përgatitur për çdo skenar dhe do të qëndrojmë të bashkuar dhe të vendosur”, tha Netanyahu.

Sekretari i Përgjithshëm i OKB-së Antonio Guterres paralajmëroi kundër një “përshkallëzimi të rrezikshëm” të armiqësive në rajon.

Krahu i armatosur i Hamasit tha se vdekja e Haniyeh, i cila shihej gjerësisht si udhëheqësi i përgjithshëm i grupit, do ta “çonte betejën në dimensione të reja” dhe do të kishte pasoja të mëdha.

Haniyeh, i cili luajti një rol të rëndësishëm në negociatat për një armëpushim në Gaza, u vra disa orë pasi mori pjesë në inaugurimin e presidentit të ri të Iranit, Masoud Pezeshkian, në Teheran.

Një zyrtar i lartë i Hamasit i tha BBC-së se vrasja ndodhi në të njëjtën ndërtesë ku Haniyeh kishte qëndruar gjatë vizitave të mëparshme në Iran.

LEXONI GJITHASHTU:

• “Vratë mikun tonë të dashur”, Irani zotohet të hakmerret ndaj Izraelit për Haniyeh
• “Lideri i Hamas humbi 60 anëtarë të familjes”, eksperti Hoti: Si u ekzekutua Haniyeh