U bllokuan te liqeni i Shtrazës në Lëpushë, policia ndihmon dy turistë belgë

Policia e Shkodrës u ka shkuar në ndihmë 2 turistëve belgë që mbetën të bllokuar te liqeni i Shtrazës në Lëpushë , si pasojë e problemeve shëndetësore gjatë eksplorimit.

Operacioni për lokalizimin dhe dhënien ndihmë 2 turistëve në terrenin e vështirë malor, zgjati 4 orë dhe u krye nga SPK Grabom dhe PKK Bashkim, në bashkëpunim me Policinë malazeze, bëri me dije policia.

“Mëngjesin e sotëm, sapo janë njoftuar se 2 turistë belgë kërkonin ndihmë sepse kishin shfaqur probleme shëndetësore gjatë eksplorimit të liqenit të Shtrazës në Lëpushë, SPK Grabom dhe PKK Bashkim, në bashkëpunim me Policinë malazeze (për shkak se lokacioni ishte më i aksesueshëm nga Mali i Zi), kanë organizuar punën për të gjetur dhe ndihmuar turistët.

Pas 4 orësh kërkime në një terren shumë të vështirë malor, ata janë gjetur dhe janë transportuar në spital, për të marrë asistencë mjekësore”, thuhet më tej në njoftimin e policisë.