Sabotim në bazën ushtarake gjermane, izolohet pas dyshimeve për helmim të ujit

Një bazë ushtarake në Gjermani, në afërsi të aeroportit të Këlnit u izolua përkohësisht pas paralajmërimeve se uji ishte i kontaminuar.

Baza, ku punojnë rreth 5 mijë e 500 persona, ishte në gjendje alarmi pas zbulimit të një vrime të hapur në tubacion. Personat e pranishëm qëndruan atje, por u udhëzuan të mos konsumonin ujë rubineti.

Policia dhe shërbimet e inteligjencës po hetojnë për një akt sabotimi dhe kampione të ujit janë marrë për t’iu nënshtruar analizave.

Edhe në qytetin tjetër Gajlen Kirhen, një bazë e NATO-s ngriti nivelin e sigurisë pas dyshimeve për një tjetër akt sabotimi. Por një zëdhënës tha se uji ishte kontrolluar dhe cilësia e tij ishte në rregull.

Më herët, NATO kishte dhënë alarmin për akte armiqësore të Rusisë në Evropë, që përfshinin sulme kibernetike dhe akte sabotimi.

Megjithatë, mbetet e paqartë se kush mund të ketë siguruar akses ilegal në bazën ajrore.

LEXONI GJITHASHTU:

• Aktivistët e krizës klimatike ndalojnë trafikun ajror në aeroportet gjermane
• Stuhi në Evropën Perëndimore, reshje dhe përmbytje në Gjermani e Belgjikë