“Ura e Ibrit, jo temë dialogu me Serbinë”- Osmani takon komandantin e KFOR

Presidentja e Kosovës, Vjosa Osmani deklaron se çështja e hapjes së Urës së Ibrit nuk duhet përfshihet në temat e dialogut me Serbinë. Në një takim të zhvilluar me komandantin e KFOR-it, gjeneralmajor Özkan Ulutash, presidentja ka theksuar se ura e Ibrit është një çështje e brendshme e Kosovës që u shërben të gjitha komuniteteve.

Nga ana tjetër, Osmani ka theksuar se Qeveria e Kosovës duhet të ketë një plan të përbashkët me aleatët e NATO-s lidhur me hapat që do të ndërmerren për procesin e hapjes së urës.

Në njoftimin e presidencës së Kosovës thuhet se kryetarja e shtetit, ka folur me zyrartin e Kfor për koordinimin mes institucioneve tona dhe partnerëve të sigurisë, veçanërisht me NATO-n, në mënyrë që të ndërtohet plani i përbashkët i zbatimit për hapjen e urës.

Osmani është shprehur se institucionet e sigurisë së Kosovës dhe NATO-s duhet të kenë vlerësimet e sigurisë dhe interesat e qytetarëve.

Më herët, Osmani ka kundërshtuar deklaratat e zëdhënësve të Bashkimit Europian që kanë kërkuar diskutimin e kësaj çështje në takimet e rregullta që zhvillohen në Bruksel mes Kosovës dhe Serbisë. Ajo i ka cilësuar këto deklarata si raciste dhe qëndrime që nuk marrin parasysh interesat e qytetarëve të Kosovës.

LEXONI GJITHASHTU:

• Kurti: Do vazhdojmë konsultimet dhe koordinimet me partnerët tanë për urën e Ibrit
• Ura e Ibrit testohet me kamionë, prezentë forca të policisë