SHBA për marrëveshjen bërthamore me Iranin: S’është në agjendën tonë

Marrëveshja bërthamore mes Iranit dhe SHBA-së vazhdon të mos jetë në agjendë për administratën e presidentit amerikan Biden, tha një zëdhënës i Departamentit amerikan të Shtetit më 26 gusht.

Kjo deklaratë vjen teksa Teherani bëri thirrje për “negociata të reja” për të përditësuar marrëveshjen.

Një zëdhënës i Departamentit Amerikan të Shtetit tha se marrëveshja bërthamore, e arritur më 2015, “nuk është në agjendë tani”.

“SHBA-ja, në një mënyrë apo një tjetër, do të sigurohet që Irani kurrë të mos ketë armë bërthamore dhe ne jemi të përgatitur që të përdorim të gjitha elementet e fuqisë kombëtare për të arritur këtë gjë”, tha zëdhënësi.

Megjithatë, Uashingtoni mendon se “diplomacia është mënyra më e mirë për të arritur një zgjidhje të qëndrueshme dhe efektive”, deklaroi zëdhënësi i DASH-it.

Marrëveshja bërthamore kërkonte kufizimin e programit bërthamor të Iranit dhe niveleve të pasurimit të uraniumit, duke vendosur kufizimin deri në 3.67 për qind të pasurimit të uraniumit.

Por, Trump tërhoqi SHBA-në nga marrëveshja më 2018 dhe rivendosi sanksionet.

Irani u hakmor duke shkelur në mënyrë graduale parimet e marrëveshjes dhe aktualisht po pasuron uraniumin deri në 60%.

LEXONI GJITHASHTU:

• Kim Jong Un teston dronët shpërthyes, SHBA e Koreja e Jugut stërvitje të përbashkët
• Sulmet e Hezbollah, Biden: SHBA do vazhdojë të mbështesë Izraelin