Hidhet lëndë shpërthyese në oborrin e një shtëpie në Zubin Potok

Policia e Kosovës ka konfirmuar se në orët e hershme të së mërkurës është hedhur një sasi lënde shpërthyese në oborrin e një shtëpie të banuar me serbë në Zubin Potok.

Sipas mediave të huaja, zëvendësdrejtori i Policisë së Kosovës për Veriun, Veton Elshani, ka thënë se dyshimet ekzistojnë që bëhet fjalë për granatë dore.

“Ka pasur dëme materiale në vetura dhe në dritaren e shtëpisë”, ka thënë ai, duke treguar se Policia ka nisur hetimet për këtë rast.

Elshani nuk ka bërë të ditur nëse ka pasur pasoja në njerëz.

Një rast si ky nuk është i rrallë në veriun e Kosovës në vitet e fundit.

Për hedhje të mjeteve shpërthyuese dhe djegie të veturave është raportuar disa herë në këtë rajon, sidomos në kohën e riregjistrimit të makinave me targa ilegale serbe në ato RKS – Republika e Kosovës.

Zubin Potoku, bashkë me Mitrovicën e Veriut, Zveçanin dhe Leposaviqin, janë katër komunat me shumicë serbe në Veri, shkruan REL.

Tensionet në atë pjesë kanë qenë relativisht të larta në muajt e fundit, për shkak të atyre që Qeveria i konsideron si hapa për shtirje të sovranitetit në atë pjesë.

LEXONI GJITHASHTU:

• Gjenden mbetje mortore në veri të Kosovës
• Lajçak u takua me Vuçiç në Pragë, por jo me presidenten e Kosovës Vjosa Osmani