Sondazhi: Më shumë mbështetje për planin ekonomik të Trump se propozimet e Harris

Një numër më i madh i votuesve amerikanë mbështesin planet ekonomike dhe zgjidhjet tatimore të kandidatit republikan presidencial Donald Trump në krahasim me planet fiskale të rivales së tij demokrate Kamala Harris, sipas një sondazhi të Reuters/Ipsos të publikuar sot.

Ish-presidenti republikan dhe kundërshtarja e tij demokrate janë zotuar të vazhdojnë uljet e taksave nëse fitojnë zgjedhjet e 5 nëntorit dhe votuesit e shohin Trumpin si më shumë gjasa për të reduktuar borxhin prej 35 trilionë dollarësh, edhe pse parashikuesit e pavarur ekonomikë thonë se propozimet e tij do të kishin efektin e kundërt, shkruan Reuters.

Sondazhi zbuloi se 37 për qind e votuesve amerikanë mendojnë se Trump ka më shumë gjasa të fokusohet në uljen e borxhit publik, krahasuar me 30 për qind që mendojnë të njëjtën gjë për Harris.

Rreth 30 për qind e votuesve shprehën mendimin se asnjë kandidat presidencial nuk do të fokusohet te borxhi.

Gjatë debatit të së martës, Harris përmendi një paralajmërim nga Goldman Sachs se tarifat dhe politikat e tjera të Trump do të ngadalësojnë ekonominë, duke shtuar se shumë ekonomistë të pavarur besojnë se politikat e Trump do të rrisin borxhin kombëtar.

Disa analistë të shquar besojnë se propozimet e Trumpit për taksat i shtojnë të paktën 3 trilion dollarë deficitit federal gjatë një dekade, ndërsa propozimet e zëvendëspresidentit shtojnë më pak se 2 trilion dollarë ose mundësisht reduktojnë borxhin.

Mes votuesve të anketuar, 47 për qind thanë se Trump kishte më shumë gjasa t’i jepte përparësi nxitjes së një klime të mirë biznesi, krahasuar me 37 për qind që zgjodhën Harris.

LEXONI GJITHASHTU:

• Ish drejtuesi i FBI bën deklaratën e fortë: Trump konsiderohet si një aset rus
• Trump përjashton mundësinë për debatin e dytë presidencial kundër Harris