Me prirje të majta, betohet Presidenti i ri i Sri Lankës

Anura Kumara Dissanayake, është betuar si Presidenti i ri e Sri Lankës, duke premtuar politikë “të pastër” ndërsa vendi rimëkëmbet nga kriza e tij më e keqe ekonomike.

Sipas mediave të huaja, Dissanayake me prirje të majtë e ka konsideruar veten si një përçarës të status quo-së dhe analistët e shohin fitoren e tij si një refuzim të korrupsionit dhe nepotizmit që ka pllakosur prej kohësh vendin.

Zgjedhjet e së shtunës ishin të parat që nga viti 2022, kur pakënaqësia mbi ekonominë nxiti protesta masive dhe rrëzoi nga pushteti ish-presidentin Gotabaya Rajapaksa.

“Ne duhet të krijojmë një kulturë të re të pastër politike,” tha ai. “Unë angazhohem për ta arritur këtë. Ne do të bëjmë çmos për të rifituar respektin dhe besimin e popullit për sistemin politik.”

55-vjeçari, i njohur gjithashtu si AKD, i tha popullit se “demokracia nuk përfundon me emërimin e një lideri”.

“Ne duhet të forcojmë demokracinë. Unë zotoj të bëj maksimumin për të mbrojtur demokracinë,” tha ai.

“Unë kam thënë më parë se nuk jam një magjistar, unë jam një qytetar i zakonshëm. Ka gjëra që i di dhe nuk i di. Objektivi im më i madh është të mbledh ata me njohuri dhe aftësi për të ndihmuar në ngritjen e këtij vendi”, shtoi ai.

Dissanayake mori bekimin budist në fund të fjalimit të tij. Përfaqësuesit e feve të tjera të Sri Lankës – Islami, Hinduizmi dhe Krishterimi – ishin gjithashtu të pranishëm gjatë betimit.

LEXONI GJITHASHTU:

• Sri Lanka zhvillon zgjedhjet e para që nga protestat për rrëzimin e presidentit
• Treni del nga shinat në Sri Lanka, 16 të plagosur