Italia dhe Shqipëria nënshkruajnë memorandum për bashkëpunim në sigurisë kibernetike

Sot në Tiranë u nënshkrua një memorandum mirëkuptimi ndërmjet Drejtorit të Përgjithshëm të Agjencisë Kombëtare të Sigurisë Kibernetike Italiane (ACN) Bruno Frattasi dhe Drejtorit të Përgjithshëm të Autoritetit Kombëtar Shqiptar të Sigurisë Kibernetike (NCSA), Igli Tafa.

Përmes një njoftimi të publikuar në faqen zyrtare, ambasada e Italisë e cilëson këtë një hap të rëndësishëm në procesin e bashkëpunimit dypalësh ndërmjet Italisë dhe Shqipërisë në fushën e sigurisë kibernetike.

Marrëveshja parashikon bashkëpunim në sektorët e mëposhtëm: forcimi i aftësive kibernetike; shkëmbimin e informacionit; adoptimin e praktikave të mira; shkëmbimin e përvojave dhe procedurave në fushën e sigurisë së TI-së; asistencë reciproke në parandalimin dhe menaxhimin e incidenteve të TI-së; zhvillimin e projekteve të përbashkëta strategjike.

Bruno Frattasi, Drejtor i Përgjithshëm i Agjencisë Kombëtare të Sigurisë Kibernetike, ACN, deklaroi:

“Jam shumë i kënaqur me marrëveshjen e nënshkruar me Autoritetin Kombëtar Shqiptar të Sigurisë Kibernetike (NCSA), pasi forcon bashkëpunimin dypalësh mes vendeve tona në një sektor vendimtar siç është siguria kibernetike. Në një kontekst të kërcënimeve kibernetike gjithnjë e më të sofistikuara dhe të përhapura, në fakt, është thelbësore që Italia dhe Shqipëria të bashkojnë forcat për të përmirësuar sigurinë dhe qëndrueshmërinë e infrastrukturave tona kritike. Jo vetëm që do të forcohet kapaciteti i reagimit ndaj sulmeve kibernetike, por do të kontribuojë gjithashtu në stabilitetin dhe sigurinë e zonës së Adriatikut, një rajon me rëndësi strategjike për të dy vendet. Me Italinë si partnerin më të madh tregtar të Shqipërisë, është thelbësore që edhe dimensioni i sigurisë kibernetike të përputhet me nivelet e larta të bashkëpunimit midis dy vendeve. Për sa i përket Italisë, ritheksojmë se jemi veçanërisht të fokusuar në zbatimin e strategjisë kombëtare, e cila ndër objektivat e saj përfshin edhe forcimin e bashkëpunimit dypalësh dhe shumëpalësh”.