Izraeli njofton sulme të reja në Dahieh, bastionin e Hezbollahut në Bejrut

Izraeli ka nisur një sulm të ri në bastionin jugor të Hezbollahut në Bejrut, Dahieh, thotë ushtria e tij.

Agjencia e lajmeve AFP thotë se korrespondentët e saj dëgjuan një shpërthim të fortë dhe panë tym që dilte nga zona.

Sipas mediave të huaja, Dahieh dikur ishte zemra e Hezbollahut në Bejrut. Tani duket si një qytet fantazmë.

Në periferitë jugore të qytetit rrugët janë bosh dhe dyqanet janë të mbyllura. Mijëra njerëz janë larguar dhe të tjerë ende po përpiqen të ikin.

Dhe në të gjithë Bejrutin këtë mëngjes, u dëgjua zhurma e shpeshtë e dronëve që fluturonin sipër qytetit.

Izraeli ka paralajmëruar njerëzit në të gjithë vendin që të qëndrojnë larg vendeve të lidhura me Hezbollahun, pasi ai zotohet të vazhdojë fushatën e tij kundër grupit, edhe pas vrasjes së liderit të tij, Hassan Nasrallah.

Pasi ushtria izraelite tha se kishte kryer një tjetër sulm në Dahieh, imazhet tregonin një shtëllungë të madhe tymi që kishte mbuluar zonën.

Ka pikëpyetje të shumta sesi do të përgjigjet Hezbollahu ndaj këtyre sulmeve. Grupi ka ende një arsenal të frikshëm armësh, me raketa me rreze të gjatë veprimi të afta për të goditur thellë brenda Izraelit.

LEXONI GJITHASHTU:

• Analiza: Vrasja e Nasrallah, humbje e madhe për Hezbollahun dhe Iranin
• Hezbollahu konfirmon se lideri i tij, Nasrallah u vra nga sulmet izraelite