Anija me emigrantët e parë ankorohet në portin e Shëngjinit, policia njoftim zyrtar

Mëngjesin e kësaj të mërkure, anija “Libra” ka mbërritur pranë brigjeve të portit të Shëngjinit me 16 emigrantët e parë afganë.

Anija është shoqëruar nga dy varka të tjera të policisë dhe është ankoruar në port.

Policia e shtetit përmes një njoftimi për mediat bëri me dije se anija Libra me 16 emigrantë në bord u ankorua në port dhe se nga ana e policisë janë marrë të gjitha masat për zbatimin e procedurave të përshpejtuara kufitare.

“Në portin e Shëngjinit u ankorua anija “Libra” e marinës italiane, me 16 emigrantë në bord, të cilët pas procedurave të verifikimit do të akomodohen në kampin e ngritur në Gjadër, Lezhë. Policia e Shtetit ka marrë të gjitha masat për sigurinë dhe për zbatimin e procedurave të përshpejtuara kufitare”, bën me dije policia.

Refugjatët afganë që mbërritën me anijen “Libra” do të jenë të parët që fillojnë jetesën e tyre në kampin e krijuar sipas marrëveshjes së nënshkruar mes kryeministrit shqiptar Edi Rama dhe kryeministres italiane Giorgia Meloni.

Procedura e aplikimit për azil pritet të përfundojë brenda 4 javësh. Emigrantët që plotësojnë kriteret do të transferohen në Itali, ndërsa ata që nuk e kanë këtë të drejtë do të riatdhesohen pas qëndrimit në kamp.

Përshpejtimi i procesit për apelimet do të realizohet përmes lidhjeve me video me gjykatën e Romës, ku afati për shqyrtim është përgjysmuar në 7 ditë për shkak të dekretit të miratuar për fluksin e ri të refugjatëve.

16 emigrantët e parë udhëtuan me anijen e patrullimit 80 metra të gjatë, e cila ishte e shoqëruar nga një ekuipazh prej rreth 70 ushtarësh.